વિપ્રલંભિની

♥ પંચમ શુક્લ

મંદ મઘમઘતો પવન તારા-જ સ્મરણો લાવશે !
ફૂલ પાંખડીઓય ખરનારા જ સ્મરણો લાવશે !

તટ તરંગો લ્હેરશે ને ફીણ ફગફગ વેરશે,
રેત પરનું નામ ભુંસનારા જ સ્મરણો લાવશે!

સાંજ અજવાળી- ગુલાબી, કેસરી, પીળી કરી,
યાદ સાતે રંગની ખારા જ સ્મરણો લાવશે!

પાંખના ફફડાટ પાછળ ડૂબશે કલરવ બધા,
ને ક્ષિતિજની રેખ અંધારા જ સ્મરણો લાવશે!

ચાંદની રાતે તડપશે આ ચકોરી એકલી,
રૂપની સોબત તરસનારા જ સ્મરણો લાવશે!

અશ્રુ-ભીની આંખ હરનિશ ખાળશે તંદ્રા છતાં,
સ્વપ્નની વર્ષા સળગનારા જ સ્મરણો લાવશે!

૨૦/૬/૦૯

છંદોવિધાનઃ ગાલગાગા ગાલગાગા ગાલગાગા ગાલગા

ઋણસ્વીકાર: ‘સપના’ (બાનુમા વિજાપુરા)ની એક ગઝલના અનુનાદ રૂપે રચાયેલી કૃતિ.  

19 Comments

  1. Posted December 4, 2011 at 2:06 am | Permalink

    મઘમઘતી ગઝલ ! ખૂબ જ મજાનું, અર્થસભર ને તેથી જ સાર્થક શીર્ષક !!

    બધા જ શેરમાં ઈન્દ્રીયોના વીષયોને બન્ને પંક્તીમાં સાચવ્યા ને સાંકળ્યા છે છે ફક્ત ચોથા શેરમાં કાનનો વીષય બીજી પંક્તીમાં સંકળાતો નથી. (સાચું ?)

    • Posted December 4, 2011 at 9:51 am | Permalink

      આભાર જુ.કાકા.
      ઈન્દ્રિયોને સાંકળતું અર્થઘટન ઉમેરી કાવ્યને તમે એક નવું પરિમાણ આપ્યું. મને પણ જાણવા મળ્યું.

  2. Dhrutimodi
    Posted December 4, 2011 at 2:11 am | Permalink

    સ-રસ ગઝલ.

    તટ તરંગો લ્હેરશેને ફીણ ફગફગ વેરશે,
    રેત પરનું નામ ભુંસનારા જ સ્મરણો લાવશે!
    સુંદર!!!!!!!!!!

  3. Posted December 4, 2011 at 4:47 am | Permalink

    આ શું પંચમદાનું નવીનીકરણ છે ? છેલ્લા કેટલાક સમયથી હું મારા જેવાને સહજતાથી સમજ પડે એવા જ કાવ્ય આસ્વાદી રહ્યો છું…

    સુંદર ગઝલ…

    • Posted December 4, 2011 at 9:32 am | Permalink

      વિવેકભાઈ, આ રચના 2009માં થઈ હતી. જે સમયે જેવું સૂઝે અને સ્ફૂરે એવું લખાય છે. જુદા જુદા મિત્રોને જુદી જુદી શૈલીની રચનાઓ ગમે છે એ જાણી મને પણ મોજ પડે છે.

  4. SirajPatelPaguthanvi
    Posted December 4, 2011 at 9:55 am | Permalink

    પાંખના ફફડાટ પાછળ ડૂબશે કલરવ બધા,
    ને ક્ષિતિજની રેખ અંધારા જ સ્મરણો લાવશે!

    As always a very nice poetic creation by Pancham.

    Siraj Patel “Paguthanvi”
    Secretary
    Gujarati Writers’Guild-UK (Estd 1973)

  5. Posted December 4, 2011 at 11:29 am | Permalink

    સરસ!

  6. kishoremodi
    Posted December 4, 2011 at 2:34 pm | Permalink

    સુંદર મઘમઘતી ગઝલ.

  7. pragnaju
    Posted December 4, 2011 at 3:36 pm | Permalink

    મઝાની ગઝલ
    પાંખના ફફડાટ પાછળ ડૂબશે કલરવ બધા,
    ને ક્ષિતિજની રેખ અંધારા જ સ્મરણો લાવશે!

    ચાંદની રાતે તડપશે આ ચકોરી એકલી,
    રૂપની સોબત તરસનારા જ સ્મરણો લાવશે!
    વાહ
    પંચતંત્રની યાદ આપી

    अंतॆ विप्रलंभिनी, वानर-जातिर् इव विद्रुतानॆक-चित्ता…

  8. Posted December 5, 2011 at 1:59 am | Permalink

    સંસ્કૃત વિરહનો ગુજરાતી અનુભવ ગમ્યો.આ વધારે ગમ્યું…
    પાંખના ફફડાટ પાછળ ડૂબશે કલરવ બધા,
    ને ક્ષિતિજની રેખ અંધારા જ સ્મરણો લાવશે!

  9. Dharmani Bhavesh C.
    Posted December 5, 2011 at 7:11 am | Permalink

    – ‘khara’ na sthane ‘kaara'(‘kaala’) athava ‘andhara’ ane ‘andhara’ na sthane ‘badhira’ muki joiye to…? Parantu, ‘ne xitij ni rekh’ sathe ‘andhara’ j jame chhe. To pachhi… ‘kali kotadi ni dhar badhira j smarano lavashe’ em kahiye to? Is it matching yours’ and the poem’s temperament? Trying to learn…

  10. Posted December 5, 2011 at 1:11 pm | Permalink

    પ્રિય પંચમદા,
    અહાહા એ જમાનો યાદ આવી ગયો, જ્યારે તમે એક એક પંકતિમાં મારી મદદ કરતા હતા. અને આ ગઝલ માટે તમે મને ખૂબ મદદ કરેલી એનો ૠણ સ્વીકાર હું કરું છૂ મને ત્યારે પણ આ ગઝલ આટલી જ ગમી હતી અને આપના નામે મારાં બ્લોગમાં મૂકેલી જે આપે મને અર્પણ કરેલી આજે પણ એટલી જ વહાલી છે.. અહીં મારી ગઝલ મૂકવાની ગુસ્તાખી કરુંછું. આપનાં ઘણાં એહસાનો છે…ભૂલવા માટે નહીં યાદ રાખવા માટૅ..
    સપના

    સ્મરણો લાવશે.

    મંદ મઘમઘતો પવન તારા જ સ્મરણો લાવશે,
    ફૂલની આ ઓસ પ્રિય તારા જ સ્મરણો લાવશે.

    ચાંદની આ રાત, ભીંજાતા તડપતા એ ચકોર,
    રૂપથી રૂપેરી નદી તારા જ સ્મરણો લાવશે.

    સાંજ અજવાળા કરે ગુલાબી મજાના એ છતાં,
    આભનાં ઓજસ હવે તારા જ સ્મરણો લાવશે.

    છે હવામાં ગુંજતો કલરવ પક્ષીઓનો ,પ્રિતમ,
    પ્રેમનાં એ ગીત હા,તારા જ સ્મરણો લાવશે.

    રેતનાં પગલાં સ્મરણને હચમચાવી નાખશે,
    રેત પરનું નામ પ્રિય તારા જ સ્મરણો લાવશે.

    જોઉ છું હું રાહ ,મારી આંખ પળ ભર જો મળે,
    આજ સપનાં આંખનાં તારા જ સ્મરણો લાવશે.

    સપના

  11. Posted December 6, 2011 at 1:17 am | Permalink

    પ્રિય પંચમ તથા સપનાજી,

    આ બન્ને ગઝલોને સાથે રાખીને રસદર્શન કરવું છે, જો બન્ને સર્જકો મંજૂરી આપો.

  12. Posted December 7, 2011 at 7:24 am | Permalink

    અનોખી ગઝલ. દરેક શેર લાજવાબ છે

  13. Posted December 14, 2011 at 5:42 am | Permalink

    મધુરો કલરવ ને મઘમઘતી ગઝલ અંદર અને બહાર બધે સ્પર્શી ગઈ.
    શ્રી પંચમભાઈ..આદરણીય શ્રી જુગલકિશોરજીના રસ દર્શન માટે ઈંતજારી.
    રમેશ પટેલ(આકાશદીપ)

  14. Posted December 19, 2011 at 1:49 am | Permalink

    વિપ્રલંભિની-શિર્ષકને ન્યાય આપતી મજાની રચના. આ બે શેર ખાસ પસંદ પડ્યા
    પાંખના ફફડાટ પાછળ ડૂબશે કલરવ બધા,
    ને ક્ષિતિજની રેખ અંધારા જ સ્મરણો લાવશે!
    અને
    અશ્રુ-ભીની આંખ હરનિશ ખાળશે તંદ્રા છતાં,
    સ્વપ્નની વર્ષા સળગનારા જ સ્મરણો લાવશે!
    વિપ્રલંભની વાત નીકળી તો આ કૃતિ યાદ આવી ..
    http://www.mitixa.com/2008/106.htm


One Trackback/Pingback

  1. […] વિપ્રલંભિની Uncategorized var addthis_product = 'wpp-262'; var addthis_config = {"data_track_clickback":true,"data_track_addressbar":false};if (typeof(addthis_share) == "undefined"){ addthis_share = [];}♥ પંચમ શુક્લ મંદ મઘમઘતો પવન તારા-જ સ્મરણો લાવશે ! ફૂલ પાંખડીઓય ખરનારા જ સ્મરણો લાવશે ! તટ તરંગો લ્હેરશે ને ફીણ ફગફગ વેરશે, રેત પરનું નામ ભુંસનારા જ સ્મરણો લાવશે! સાંજ અજવાળી- ગુલાબી, કેસરી, પીળી કરી, યાદ સાતે રંગની ખારા જ સ્મરણો લાવશે! પાંખના ફફડાટ પાછળ ડૂબશે કલરવ બધા, ને ક્ષિતિજની રેખ અંધારા જ સ્મરણો લાવશે! […] પંચમ શુક્લ (પ્રત્યાયન) […]

Post a Comment

Required fields are marked *
*
*

%d bloggers like this: